വൈജ്ഞാനികമലയാളം ജൂലൈ-സെപ്റ്റംബർ 2026 ലക്കം പ്രകാശിതമാവുകയാണ്. അധ്യാപകർക്കൊപ്പം തന്നെ ധാരാളം ഗവേഷകരും ലേഖനങ്ങൾ എഴുതുന്നു എന്നതാണ് ഈ ലക്കത്തിന്റെ പ്രത്യേകത. ചരിത്രം,രാഷ്ട്രീയം,സിനിമ, നിർമ്മിത ബുദ്ധി,സാഹിത്യ നിരൂപണം എന്നിങ്ങനെ വൈവിധ്യമാർന്ന വിഷയങ്ങൾ പുതിയ ലക്കം കൈകാര്യം ചെയ്യുന്നുണ്ട്.

 2025 ഐ.എഫ്. എഫ്. കെ.യിൽ അംഗീകാരം ലഭിച്ച യുവസംവിധായകൻ ഉണ്ണികൃഷ്ണൻ ആവളയുമായി ഡോ. അമ്പിളി ആർ.പി. നടത്തുന്ന അഭിമുഖം ഈ ലക്കത്തെ സവിശേഷമാക്കുന്നു. അദ്ദേഹത്തിന്റെ മാത്രമല്ല പുതിയ കാലഘട്ടത്തിന്റെ കൂടി കാഴ്ചപ്പാടുകൾ ഈ ഇന്റർവ്യൂവിൽ പ്രത്യക്ഷമാകുന്നുണ്ട്. മുമ്പെങ്ങും സിനിമയുടെ ഫ്രെയിമിൽ ഇടം നേടാതിരുന്ന മനുഷ്യരും കാഴ്ചകളും പുതിയ തലമുറയുടെ സിനിമകളിലൂടെ ലോകത്തോട് സംസാരിക്കുന്നു. പുതിയ എഴുത്തിന്റെയും സിനിമയുടെയും രാഷ്ട്രീയം അതിലെ സത്യസന്ധത കൊണ്ടു തന്നെ ശ്രദ്ധേയമാകുന്നുണ്ട്. ലോകത്തിന്റെ രാഷ്ട്രീയം മാറുന്ന സാഹചര്യമാണിത്. നീതി നഷ്ടപ്പെടുന്ന സമൂഹം പുതിയ കാലത്തിന്റെ സിനിമകളിലൂടെ നമ്മുടെ കാഴ്ചകളിലേക്ക് കടന്നു വരുന്നു.ഇത്തരം സിനിമകൾ കൂടുതൽ പ്രേക്ഷകരിലേക്ക് എത്തിച്ചേരേണ്ടതുണ്ട്. സിനിമയുടെ വേറിട്ട വഴികൾ അന്വേഷിക്കുന്നവർക്ക് ഈ ഇന്റർവ്യൂ തീർച്ചയായും പ്രയോജനകരമാവും.

സാങ്കേതികതയുടെ അതിപ്രസരം പല ഭാവങ്ങളിൽ നമ്മുടെ ജീവിതത്തിൽ ആവേശിച്ചിട്ടുണ്ട്. അതിന്റെ നന്മതിന്മകൾ നാം അനുഭവിച്ചു കൊണ്ടിരിക്കുന്നു. അതിലൂടെ സൃഷ്ടിക്കപ്പെടുന്ന ഭാവുകത്വത്തിന്റെ സ്വഭാവവും ഗവേഷകർ പരിശോധിക്കുന്നുണ്ട്. അങ്ങനെയുള്ള പഠനങ്ങൾ സമൂഹത്തിന്റെ ആവശ്യം കൂടിയാണ്.

 മികച്ച രീതിയിൽ ലക്കം തയ്യാറാക്കിയ എഡിറ്റർ ഷീന എസ്. അഭിനന്ദനങ്ങൾ അർഹിക്കുന്നു. ഓൺലൈൻ മാഗസിൻ രൂപകൽപ്പന ചെയ്ത  രതീഷിന് നന്ദി. ഗൗരവതരമായ വായനയ്ക്കായി പുതിയലക്കം നിങ്ങൾക്ക് മുമ്പിൽ സമർപ്പിക്കുകയാണ്.

ചീഫ് എഡിറ്റർ

ഡോ.ബി.ശ്രീകുമാർ സമ്പത്ത്

വകുപ്പധ്യക്ഷൻ

മലയാളവിഭാഗം, സർക്കാർ വനിതാ കോളേജ്,തിരുവനന്തപുരം